Barang Tanta Nda Pernah Pake

Tanta Keti pulang lebe capat dari kumpulan.Waktu dya buka pintu kamar, tanta ta kage jaha lia pa Kale lagi tidor deng nona laeng. Keti trus lari ka dapur kong ambe tu peda.

Tanta Keti: "So gila stou ngana Kale .... tidor deng orang laeng pa kitya pe tampa tidor ..... kitya potong ngana pe barang ne".

Kale balumpa dr tampa tidor kong lari bataria: "Tunggu dulu .... dengar dulu kitya pe ceritra .... kyapa sampe bagini".

Tanta Keti: "Ngana cuma cari2 alasan ...... oke ceritra lakas ...... abis itu kitya potong".

Kale: "Bagini kwa ..... tadi kitya ba stir oto, kitya lia ini nona dudu manangis dipinggir jalang, nyanda pake spatu, baju so kotor abis, caparuni nyada ta urus. Kitya jadi kasiang ...... jadi kitya bawa dya pulang. Sampe disini kitya suru dya mandi, kong abis itu kitya kase pake ngana pe CD deng BH tu kitya da kase maar ngana nyanda ja pake soalnya ngana bilang nyanda ba merk.

Abis itu kitya kase pake ngana pe baju deng spatu yang kitya ada bli, maar ngana nyanda pernah pake karna ngana bilang norak. Abis itu kitya buka pintu kong suru dya pulang.Waktu dya so mo kaluar pagar dya bilang: "Oom trima kase banyak ne ...... maar .....apa masi ada barang tu tanta so nyanda perlu deng nyanda ja pake tu kitya bisa pake?"

Kitya trus ta inga pa kitya pe barang ...... so bagitu ........ jadi tu ceritra no".