Muntah Milu

Seorang manasiswa bernama Burraco dari salah satu perguruan tiggi negeri di Manado (cuma satu memang) yang nyanda pernah turun kampung, dapat tugas KKN di Tonsea Lama. Dari Airmadidi dia nae mini bus ke Tonsea Lama. Dalam minibus, dia duduk baku sebelah deng seorang Tante yang da pangko-pangko satu karong milu. Sebelum minibus berangkat, dia tanya pa itu Tante:"Tan, for apa doq ini milu kong so nimau kase lepas begitu ?"Tante: "Ini kasiang utu, torang pe makanan pokok."Burraco: "Yah kasiang Tante, kalu di Manado, itu milu itu kuda pe makanan."Tante: "Adoh kasiang utu, memang Manado kua so modern, nyanda rupa torang sadiki primitif." Sudah...oto so berangkat. Kong so mulai nae-nae Tenggari. Belok kanan, belok kiri....Burraco pe puru so mulai mulas.....akhirnya...Burraco nyanda tahang: Burraco muntah ! Kong ternyata di Burraco pe muntah ada butiran-butiran milu sisa tinutuan yang dia baru abis semokol akang di terminal Airmadidi. Tante: "Syofiur....stop dulu ..... stop !"Sopir: "Kiapa Tante...stop ?"Tante: "Napa kuda da ba muntah...!"