Tanta Vony termasuk orang yang lumayan di kampung. Dia pe anak Roy sudah 1 taon da kuliah di salah satu Universitas swasta terkenal di Jakarta tempat kuliah anak2 orang kaya.
Bulan pertama, dia telepon pa dia pe mama :
Roy : "Mama..., kirim akang doi for mo ganti kita pe HP deng mo beli baju rupa tu tamang2 punya".
Tanta Vony : "Iyo dang...nanti mama transfer 20 juta pera".
Bulan ketiga, Roy minta doi lei (dapa lia Roy so molai terpengaruh deng dia pe tamang2).
Roy : "Mama ..., napa kita pe laptop so besae...kita mo ganti deng tu merk Sony Vaio... ".
Tanta Vony : "Oh.. iyo dang.. ini mama mo transfer 25 juta pera".
Bulan ke duabelas, Roy minta doi lei for beli oto honda Jazz (padahal tanta Vony pe kobong so abis da jual for Roy pe keperluan).
Roy : "Mama....., beli akang oto kwa kita... beli jo tu honda jazz.. depe harga cuma 205 juta...".
Satu bulan kemudian Tanta Vony transfer doi for Roy 215 juta.
Roy : "Mamaaaa... kita cuma minta 205 juta, kiapa mama transfer 215 juta...".
Tanta Vony : "Iyo no... tu 205 juta ngana beli honda jazz, kong tu 10 juta ngana beli akang "tenda" kong ngana capat kirim kamari karna tu rumah mama so jual..."
No comments:
Post a Comment