Baku Lawang Jago

Orang SaTal :

So torang pe pante tu paling banyak cakalang basar. Torang so brapa kali mangael di pante Talaud , kong dapa ikang Cakalang yang depe panjang amper sama deng itu jalan Boulevard di Manado

Orang Minahasa :

Odo do eh Ungke ….ngana nentau stou Sayor Kangkong pa torang pe Danau Tondano subur sampe jadi basar skali : ngana mo tau… depe daong sama deng ngoni pe susiru di Sanger kong depe batang sama deng pipa aer ledeng di Manado.

Orang BolMong :

Ngoni samua blung tau koteen kang? Pernah di Kotamobagu, waktu torang bagale lobang for parigi…torang dapa balanga goreng kuno…... depe basar amper sama deng danau Tondano.

Orang SaTal deng Orang Minahasa :

Ahhh so putarbale koman ngana ini UYO…. Coba ngana pikir mana ada orang didunia ini bisa beking balanga goreng basar skali begitu…!!! ???

Orang BolMong :

He he he … Utu deng Ungke....dengar bae2 kita mo bilang...... Ngoni dua ini memang masih biongo ….!!! Coba ngoni dua bapikir,.... kalo nyanda ada blanga basar begitu, bagimana ngoni dua mo tumis atau goreng ngoni pe kangkong deng ikang putarbale itu dang ???

Orang SaTal deng Orang Minahasa : ?!!?&%@*?? Boleh jo ngana Abo !!!