Danau Tondano pe Loas

Otje salalu nimau kala kalu bacirita deng Ola.

Otje: "La, kita kua tau samua keadaan di Minahasa"

Ola: "Molai lei ngana pe makang puji"

Otje: "Kalu nda percaya, no tanya jo pa kita. Kalu kita nyanda dapa jawab, kita bayar spulu ribu pera, Maar kalu kita tanya kong ngana nyanda dapa jawab, ngana cuma bayar saribu pera"

Ola: "Setuju. Apa dang ngana pe pertanyaan?"

Otje: "Brapa ni danau Tondano pe loas?"

Ola: "Sapa lei mo pi ukur ni danau. Ngana ada ada jo"

Otje: "Ha, nintau to, kase kamari jo tu saribu."

Ola: (Nimau kala). "Binatang apa yang kalu nae gunung Lokon pake tiga kaki maar waktu turung pake ampa kaki"

Otje: "Ngana pe moskon deng ngana. Binatang apa lei itu. Nyanda pernah kita tau". (Terpaksa Otje kase spulu ribu).

Otje: "La, kase tau kua pa kita binatang apa dang kalu nae Lokon pake tiga kaki maar waktu turung pake ampa kaki?"

Ola: "Kita lei nintau" (sambil kase saribu pa Otje kong lari).

So itu kua ngana Otje, jang tunjung pande. Napa Ola so tatawa mangingi di warong tinutuan