Polisi Dusu

Satu kali kata ada satu Oom nyong, ada uji de pe BMW, baru di Highway, mar lantaran de pe asyik, dia nyanda taro kira ada opas polisi ada parkir di pinggir jalan jaga tangka orang-orang yang melanggar batas kecepatan. Itu polisi dusu pa dia...Waktu dia lia di kaca spion ada oto polisi dibelakang, dia pikir... oh...mana boleh ngana mo pi baku rebe deng kita pe BWM baru ini... jadi dia tambah tindis tu gas... Polisi dusu terus.
Dia ning tou itu polisi lei ada pake BMW yang cukup baru... akhirnya dia rasa so ning boleh lari terpaksa dia brenti di pinggir jalan kong itu polisi datang pa dia bawa de pe buku catatan.
Polisi bilang: "Dengar... kita so ampir abis kita pe jam tugas...ini kurang terakhir. SEpanjang hari kita so fastiu badengar dong pe alasan keapa dong so malanggar itu batas kecepatan. Ada yang bilang dia dokter yang musti kase beranak orang, laeng bilang dia pandeta yang musti kase urapi tu orang yang so mo mati... dll, en so vort, etc, dst..dsb... No kalu ngana ada alasan yang maso di akal kong kita nyanda pernah dengar sebelumnya , kita kase ampung pa ngana, mar kalu nyanda, sorry kita akang kase hukuman paling berat pa ngana ..."
Itu Oom manyau: "Bagini kwa, Pak.... beberapa hari yang lalu kita pe maitua lari iko satu opas polisi... kita sebenarnya sekarang so hidup senang sekali sasandiri nyanda ada orang prentah, boleh bekeng sasuka apa kita pe mau... jadi tadi waktu kita lia ada oto polisi dusu pa kita dari balakang, kita kira so dia itu polisi yang bawa lari kita pe maitua, kong sekarang mo kase kombali pa kita itu maitua. Jadi kita so katakutang setengah mati, dari itu kita tanjap itu gas supaya kita boleh tetap hidup bebas merdeka..."
Itu opas polisi tatawa riki ta miring-miring, tabongko-bongko deng talipa-lipa. Akhirnya abis tatawa lima menit, dia baru bisa brenti. Dia bilang pa itu Oom nyong: "Eh, ngana pe alasan ini, butul-butul hebat. Baru ini kita dengar komang... Terima kase ngana so bekeng tatawa pe sadap pa kita.
Silahkan berangkat... mar jangan melanggar ulang neh.....Selamat malam... en hati-hati dijalan.


om Bobby Walewangko