Cap Tikus Obat Cacingan

Waktu itu di sekolah ada guru mo kase tau bahwa alkohol berbahaya for anak-anak. Guru ambe dua gelas kong tu satu dia isi aer putih, kong tu laeng isi deng alkohol.

Kong Guru kase maso cacing di gelas. Pertama kase maso di gelas alkohol, itu cacing langsung mati.

"Mince," Guru batanya. "Co ngana beking kesimpulan dari yang ngana da lia tadi."

Mince nda reken tiga langsung jawab, "Enci, kalo kita minum cap tikus, pasti bebas dari cacing samua torang!"

Kuda Muntah di Oto

Ada mahasiswa nama Tole lagi bakuliah di Manado kong nyanda pernah turun kampung. Pas somo kelar kuliah, dia dapa tugas KKN di Tonsea Lama. Dari Airmadidi dia nae mikro ka Tonsea Lama.

Di mikro Tole dudu baku seblah deng ada satu tanta yang ada pangko-pangko satu karong milu. Sebelum berangkat, dia tanya pa itu Tante:
"Tan, for apa doq ini milu kong so nimau kase lepas begitu ?"

Tante: "Ini kasiang utu, torang pe makanan pokok."

Burraco: "Yah kasiang Tante, kalu di Manado, itu milu itu kuda pe makanan."

Tante: "Adoh kasiang utu, memang Manado kua so modern, nyanda rupa torang sadiki primitif."

Sudah...oto so berangkat. Kong so mulai nae-nae Tenggari. Belok kanan, belok kiri. Tole pe puru so mulai mulas.....akhirnya...Burraco nyanda tahang: Burraco muntah !

Kong ternyata dia pe muntah ada milu sisa tinutuan yang dia baru abis semokol akang di terminal Airmadidi.

Tante: "Syofiur....stop dulu ..... stop !"
Sopir: "Kiapa Tante...stop ?"
Tante: "Napa kuda da ba muntah...!"

Tato Matahari

Alo baru kaluar penjara kong langsung ba tato matahari di dada..

Pe abis bertato Alo berjalan ke pasar mar ndak pake kaos for mo pamer itu tato baru..

Samantara berjalan kong baku dapa deng opa, Opa bertanya: "Bos tato apa itu?"

Alo bersuara kras : "MΑTAHARI!!!"

Kong dia lanjut ba jalan...

Bulum lama ba jalan baku dapa deng utu, Utu batanya: "Woy bro tatto apa itu??!!"

Alo bersuara lebe krass: "MATAHARI!!!"

Utu ciut, Alo deng gaya lanjut ba jalan. Pas so di ujung pasar, Alo bakudapa deng polisi yang pernah tangka kong ada injang-injang pa dia..

Kong polisi ba tanya: "Wooiii!! Tato apa itu??"

Alo cuma badiam. Ni polisi pastiu, dia kase tunjung ujung senjata kong tanya:

"Woi!! Pongo ngana?? TATO APA itu??"

Lantaran Alo so gugup ada lia senjata dia langsung manyao: "Pia Komdan!!!"

Polisi: "Kong kiapa merah dang??!!"

Alo: "Banya mantega kwa, Komdan..."