Anak-anak Bale Kampung for Natal

Napa om Alo di Kauditan ba telpon pa depe anak di Jakarta pas satu minggu sebelum hari Natal.

Om Alo: Kita nda bermaksud kase berita nda bae mar kita mo se tau pa anak-anak samua kalo kita deng ngoni pe mama somo baku pisah. So cukup kita hidop menderita so 45 taong ini.."

Utu: Hah, apa papa pe maksud dang ini?

Om Alo: Kita deng ngoni pe mama so nda bisa sama-sama lagi. So baku binci torang. Jadi ngana telpon jo ngana pe kaka Pingkan di Bandung kong se tau jo noh pa dia

Utu langsung telpon depe kaka yang langsung bilang pa dia: "Dorang nda mo cere, nanti kita tangani ini masalah."

Pingkan ba telpon kong bicara pa om Utu: Ngoni nda mo baku pisah. Jang beking apa-apa karena kita deng Utu somo kasana besok pagi. Nimbole beking apa-apa sebelum torang sampe

Om Utu tutu tu telpon kong bilang pa tante Mince depe istri: Utu deng Pingkan mo bale besok for ba Natal sama-sama deng torang. Nda perlu kase kaluar doi, dorang mo bayar dorang pe tiket sandiri!

Surat for Senterklas

Ade Pingkan Senterklas ada pangko kong opa kumis putih ba tanya.

"Ade mo suka hadiah Natal apa dang?"

Ade Pingkan ba haga heran kong dia bale tanya:

"Opa Senterklas nda dapa kita pe surat?"

Kuliah di Malam Natal

Tanggal 25 Desember so tengah malam. Petu karena so talalu banya minum cap tikus bajalang miring-miring di kampung. Nda lama Pala di kampung yang baru pulang pasiar Natal dola pa dia.

Pala: Petu, ba apa ngana jam bagini so mabo lei dapa lia kang?

Petu: Eh, ini kita lagi mo pi kuliah kasiang

Pala: Kong sapa lei di bumi ini yang waras-waras mo ba kase kuliah pa ngana malam-malam kong hari Natal bagini dang?

Petu: Kita pe maitua di rumah dang...

Manyanyi Lagu Natal

Ungke ada dengar-dengar depe kaka Alo latihan manyanyi.

"Alo, bagus ngana manyanyi itu lagu-lagu Natal noh."

"Iyo, mar kiapa ngana puji-puji bagitu dang?"

Ungke: "Supaya cuma mo dengar ngana pe suara satu taong satu kali noh" (fals kote Ungke pe suara kote)

Pohon Natal for Utu

Utu: Pa, beli akang dang pohon natal for torang di rumah? Ada dang di toko yang bajual pohon Natal di pasar.

Papa: (garo-garo kapala) Papa nda ada doi mo bli, Utu.

Mar Utu minta-minta trus sampe depe Papa rasa pastiu. Karena so nda tahan, Utu pe Papa langsung ambe depe tamako kong kaluar dari rumah. Eh nda lama Utu pe Papa so bale kong bawa pohon natal pe pai skali.

Utu: (kage) Adoh, pe capat skali Papa ada potong ini pohon

Papa: Papa nda ada potong ini pohon. Papa ada ambe di toko yang bajual pohon Natal yang di pasar itu.

Utu: Kong kiapa papa bawa-bawa itu tamako dang?

Papa: Ya karena kita nimau mo bayar itu pohon noh!

Laporan Cuaca pas Natal

"Torang nda bisa kase laporan tentang cuaca di Manado sebelum Natal karena torang hanya bisa tau dari laporan cuaca yang Lapangan Mapanget jaga kirim. Mar Mapanget skarang lagi tutu oleh sebab cuaca yang nda bagus.

Jadi untuk bisa torang kase tau laporan cuaca besok di hari Natal ya tergantung dari cuaca noh!"

Cara Bunuh Babi

Tole: "Pa torang klo ba bunuh babi cuma satu kali tikang....nda bataria langsung mati" 

Ungke: "Kalo torang di Sanger cuma satu kali pulungku di Kapala , tu babi langsung tepar" 


Alo: "Kalo torang di Laikit nda bgitu komang. Kasar katu ngoni pe cara ba bunuh babi,


Torang cuma se dengar lagu natal tu babi langsung mati babadiri!!